اول مره مترو

لو انت اول مره فى حياتك تركب

لو انت اول مره تركب مترو الانفاق فى شويه حاجات لازم تخليها فى اعتبارك لان مش اى حد يعرف يركب مترو...

لو بعد ما قطعت التذكره وجاى تدخل الرصيف وبتحط التذكره فى الماكينه عشان تعدى ولقيت واحد قام لازق فى ظهرك ومعدى وراك اوعى تعترض لان ده حقه كمواطن انه يعدى ولو ده حصل معاك حاول وسع الطريق من قدامه بسرعه عشان الناس دى دايما بتبقى مستعجله فلو موسعتش هيزقك من قدامه ويمشى .

اوعى تستغرب لما تكون على رصيف المترو وتلاقى كل شويه واحد يروح يلزق فى الحيطه او يقف فى وسط الرصيف بدون هدف الناس دى يعينى عندها ضيق تنفس من كتر الروايح الجميله الى موجوده جوه عربيات المترو فبتقف تحت التكييف شويه .

وانت واقف على الرصيف فى انتظار المترو اوعى تفكر انك تروح تقعد لان فى الغالب هتلاقى الناس الحبيبه مليين كل الكراسى ولو افتكرت انك تقف جنب الكراسى لحد ما اى حد يقوم هتكتشف ان الناس دى مش مستنيه المترو ولا اساسا هيركبوه الناس دى عايزين يتقبلوا فى مكان مكيف فقالوا ننزل نقعد فى محطه المترو واهه منها توفير.

لازم وانت واقف هتسمع رساله صوتيه مسجله بتقول ان فى ابواب تدخل منها عربيات المترو وفى ابواب تنزل منها بس اما تحاول تطبق الكلام ده وتقف فى المكان المخصص لباب الصعود هتلاقى كل الناس نزله منه فلازم تدى فرصه للناس دى تنزل واوعى تعترض ولا تقول لحد ان باب النزول من الناحيه التانيه وان ده للصعود فقط لان بكده هتجرح كبرياء الناس دى وبعدين انت مين ولا ابن مين فى مصر عشان تقولى اطلع منين ولا انزل منين انا حر.... فا دى ثقافه جميله بيتميز بيها المجتمع المصرى فخلى بالك ... وخليك عرف انك لما تجى تنزل من الابواب المخصصه للنزول هتقابل ناس زيهم داخلين المترو وبرضه انصحك انك متحولش تتكلم وتنزل فى هدوء .

وعايزك متستغربش لما تيجى خارج من المحطه عند ماكنه التذاكر ولقيت ناس كتير بتنط من فوق المكن وتمشى ومحدش من الامن بيكلمهم ... ولا تعترض برضه لما التذكره بتعتك نكون بايظه او وقعت منك وتلاقى الامن لازم يدفعك غرامه مع ان فى ناس فى نفس اللحظه بتنط من فوق المكن ومحدش بيكلمها

فى النهايه عايز اقولك رحله سعيده فى مترو الانفاق وعايزك دايما تفتكر الحكمه الجميله الى على ظهر اغلب عربيات الميكروباص...... ( لا تتعجب انها اراده الله )